RELATED LINKS
Latest News
පුවත් (14)
ඩෙංගු වැළැක්වීමට අද සිට පැයක පිරිසිදු කිරීමේ කාලයක්
Written by Super User
දිවයිනේ සෑම ප්‍රදේශයකින්ම ඩෙංගු රෝගීන් වැඩි වශයෙන් වාර්තා වීමත් සමඟම අද සිට සෑම සතියකම සිකුරාදා දින උදෑසන 9.30 සිට 10.30 දක්වා පැයක කාලය පිරිසිදු කිරීමේ පැය ලෙස නම් කිරීමට සෞඛ්‍ය අමාත්‍යාංශය තීරණය කර තිබේ.
ඒ අනුව, රාජ්‍ය, පෞද්ගලික ආයතන සහ නිවාසවල අද සිට එම කාලය තුළ මදුරු කීටයන් බෝවන ස්ථාන විනාශ කිරීම ඊට අදාළ කටයුතු සිදුකළ යුතුයි.
දිවයිනේ ඇතැම් ප්‍රධාන රෝහල් ඩෙංගු රෝගීන්ගෙන් පිරී යාම නිසා මේ වනවිට ඒවායේ ප්‍රතිකාර කටයුතු සිදු කිරීම සම්බන්ධයෙන් ගැටළු මතුවී තිබෙනවා.
පවතින තත්ත්වය මත අංගොඩ උණ රෝහලට ඩෙංගු රෝගීන් ඇතුළත් කරගැනීම ඊයේ සිට තාවකාලිකව අත්හිටවුූ බවයි රෝහල් ප්‍රකාශකයෙකු සඳහන් කළේ.
රෝහලේ ඇඳන් 180ක් පවතින නමුත් මේ වනවිට ඩෙංගු සහ උණ රෝගීන් 500 කට ආසන්න ප්‍රමාණයක් ප්‍රතිකාර ලබන බව එම ප්‍රකාශකයා සඳහන් කළා.
ඩෙංගු මදුරුවන් බෝවන ආකාරයෙන් පරිසරය අපවිත‍්‍රව තබාගත් පුද්ගලයෙකුට එරෙහිව අද බලංගොඩ මහේස්ත‍්‍රාත් අධිකරණය වරෙන්තු නිකුත් කෙරුණා. බලංගොඩ අවට ප්රදේශවල මහජන සෞඛ්‍ය පරීක්‍ෂකවරුන් සහ පොලීසිය එක්ව පසුගිය සති දෙක පුරා මෙහෙයුම් සිදුකළා. එහිදී පරිසරය අපවිත‍්‍රව තබාගත් පුද්ගලයන් 21 දෙනෙකුට එරෙහිව නඩු පැවරුණා.
නඩුව සදහා අද දින පැමිණ ඇත්තේ පුද්ගලයන් 20 දෙනෙකු පමණයි. රුපියල් දහස බැගින් ඔවුන් 20 දෙනාට දඩ ගෙවන ලෙසයි බලංගොඩ මහේස්ත‍්‍රාත් ලලිත් කංනන්ගර මහතා නියෝග කළේ. අධිකරණය මගහැරි පුද්ගලයාට එරෙහිව වරෙන්තු නිකුත් කරන ලෙසද මෙහිදී නියෝග කළ බවයි නෙත් නිවුස් වාර්තාකරු පැවසුවේ.
Source: nethfm.com
මාලිගාවත්ත පිහිටි බස්නාහිර පළාත් සෞඛ්‍ය සේවා අධ්යක්ෂ කාර්යාලයට හා කොළඹ පෞද්ගලික බැංකුවක ප්‍රධාන කාර්යාලයකට ඩෙංගු මදුරුවන් බෝ කිරීමට විරුද්ධව නඩු පැවරූ බව ඩෙංගු මදුරු මර්දන ඒකකයේ විශේෂඥ වෛද්‍යවරයෙක් ඊයේ (18) රිවිරට පැවසීය.කොළඹ මහ නගර සභාව මගින් පවත්වන ඩෙංගු මර්දන වැඩසටහනකදී මෙම ස්ථාන ඊයේ (18) පරීක්ෂා කර තිබේ.
ඩෙංගු මදුරු කීටයන් බෝ කළ බවට තහවුරු වූ බැවින් ඊට විරුද්ධව කොළඹ නගර සභාවේ මහජන සෞඛ්‍ය පරීක්ෂක නිලධාරින් විසින් මෙසේ නඩු පැවරීමට තීරණය කර ඇත.එම ආයතන දෙකෙහිම ඩෙංගු මදුරු කීටයන් බෝවී ඇත්තේ ජල පෙරණ යන්ත්‍රයේ ජල රැඳවුම් ස්ථානයේ බව සඳහන්ය.
හර්ෂණී වීරරත්න
Source: www.rivira.lk
ඩෙංගු පරීක්ෂා කිරීමේ හා දැනුවත් කිරීමේ වැඩසටහනක් සතිය පුරා
Written by Super Userමෙම සතිය පුරා දිවයිනේ සෑම ස්ථානයකම ඩෙංගු පරීක්ෂා කිරීමේ හා දැනුවත් කිරීමේ ජනාධිපති කාර්ය සාධක බළකායේ වැඩසටහන සමාරම්භ කරමින් පෙරේදා (16) පෙරවරුවේ අරලියගහ මන්දිරය හා ජනාධිපති කාර්යාලය ආශ්‍රිතව ඩෙංගු මර්දන වැඩසටහන දියත් කළේය.
ඩෙංගු උවදුර මර්දනය කිරීමේ වැඩසටහනට සමගාමීව ජනාධිපති කාර්යාල පරිශ්‍රය තුළ සහ අරලියගහ මන්දිරය පරිශ්‍රය තුළ පිරිසිදු කිරීම සඳහා ජනාධිපති කාර්යමණ්ඩලයේ සහ සෞඛ්‍ය අමාත්‍යාංශයේ ඩෙංගු ක්ෂණික විහිදුම් ඒකකයේ බස්නාහිර පළාත් නිලධාරීන්ගේ හා ස්වේච්ඡා භටයන්ගේ සහභාගිත්වය ඇතිව ශ්‍රමදානයක්ද සිදු කෙරිණි.
ඊට අමතරව සෞඛ්‍ය අමාත්‍යාංශයේ අතිරේක ලේකම් වෛද්‍ය අමල් හර්ෂ ද සිල්වා මහතා විසින් ජනාධිපති කාර්යාලීය නිලධාරීන් දැනුවත් කිරීමේ දේශනයක්ද පැවැත්වූ අතර, මේ අවස්ථාව සඳහා ජනාධිපති අතිරේක ලේකම් ඩී.එස්. ගුණරත්න මහතා ඇතුළු කාර්යමණ්ඩලයද එක්ව සිටියහ.
ඩෙංගු මදුරුවන් බෝවන ආකාරය හා ඩෙංගු උවදුර ව්‍යාප්ත වන ආකාරය සම්බන්ධයෙන් මෙහිදී දීර්ඝ වශයෙන් කරුණු දක්වා සිටි අතර, ඩෙංගු උවදුරෙන් ආරක්ෂා වීමේ පුළුල් අවබෝධයක්ද මෙයට රැස්ව සිටි සේවක මහත්ම මහත්මීන් වෙත ලබාදෙන ලදී.
නිරිතදිග ඊසානදිග මෝසම් වැසි කාලය තුළ ඩෙංගු මදුරුවන් බෝවීමේ ප්‍රවණතාව ඉහළ යාහැකි බැවින් ඒ පිළිබඳ ජනතාව දැනුවත් කිරීමේ අවශ්‍යතාව දිස්ත්‍රික් මට්ටමින් මෙන්ම අමාත්‍යාංශ මට්ටමින් සහ ආයතන මට්ටමින් ක්‍රියාත්මක කිරීම සඳහා විශේෂ වැඩපිළිවෙළක්ද මේ වනවිට ක්‍රියාවට නංවා තිබේ.
ඩෙංගු මර්දනය සඳහා වන ජනාධිපති කාර්ය සාධක බළකාය 2010 වසරේදී පිහිටුවනු ලැබූ අතර, ජනාධිපතිවරයාගේ උපදෙස් පරිදි සියලු අමාත්‍යාංශ ඒකරාශී කර ගනිමින් ක්‍රියාත්මක මෙම බළකායේ ක්‍රියාකාරීත්වය හේතුවෙන් පසුගිය වසර කිහිපය තුළ ඩෙංගු උවදුර සැලකිය යුතු මට්ටමින් අවම කරගැනීමට හැකියාව ලැබුණු බවද මෙහිදී සඳහන් කෙරිණි.
Source: www.rivira.lk
2014 වර්ෂයේ ගත වූ මාස 7 තුළදී, ඩෙංගු බවට සැක කෙරෙන රෝගීන් 22876 ක් දිවයින මුළුල්ලෙන්ම වසංගත රෝග විද්‍යා ඒකකයට වාර්තා වී ඇත.
ඩෙංගු රෝගීන්ගෙන් ආසන්න වශයෙන් 57.58% ක් පමණ වාර්තා වූයේ බස්නාහිර පළාතෙනි. වැඩිම ඩෙංගු රෝගීන් සංඛ්‍යාව වාර්තා වූයේ 25වන සතිය තුළදීය.
මදුරුවන් බෝවීමට ඉඩ ඇති ස්ථාන පරිසරයෙන් අඛණ්ඩව ඉවත් කිරීම් අවශ්‍යතාව මෙම තත්ත්වය මගින් පෙන්නුම් කෙරේ. එමෙන්ම උණ රෝගය වැළඳීමෙන් දින තුනක් ඉකුත් වූ පසුත් රෝගය පවතී නම් වෛද්‍ය ප්‍රතිකාර ලබා ගැනීම වැදගත් වේ.
අවසන් යාවත්කාලීන කිරීම 2014 ජූලි 23 වෙනි බදාදා, 10:46
Source: www.epid.gov.lk
එක ඇඳේ ලෙඩ්ඩු දෙදෙනා බැගින් සිටිති
කළුබෝවිල රෝහලේ ඩෙංගු වාට්‌ටුවක්‌
ලිපිකාරිනියටත් ඩෙංගු
කට්‌ටියම 4 වැනි වාට්‌ටුවේ
ප්‍රදීප් ප්‍රසන්න සමරකෝන්
කළුබෝවිල රෝහලේ වෛද්‍යවරයෙකුට, හෙදියන් දෙදෙනකුට හා ලිපිකාරිනියකට ඩෙංගු උණ වැළඳී ඔවුන් එහි හතර වැනි වාට්‌ටුවේ නේවාසිකව ප්‍රතිකාර ලබන බව එම රෝහල් අධ්යක්ෂ වෛද්‍ය අසේල ගුණවර්ධන මහතා "දිවයින"ට ඊයේ (28 දා) පැවැසීය.
රෝගී වූ වෛද්‍යවරයා හා රෝහල් සේවකයින් තිදෙනා දින තුනක සිට නේවාසික ප්‍රතිකාර ලබන බවද හෙතෙම කීය.
පසුගිය මාස කීපය තුළදී කළුබෝවිල රෝහලේ වෛද්‍යවරුන් හා හෙදියන් ඇතුළු කාර්ය මණ්‌ඩලයේ සේවය කරන බොහෝ දෙනෙකු ඩෙංගු වැළඳී ප්‍රතිකාර ලබාගත් බවද හෙතෙම කියා සිටියේය. මේ වන විටත් ඩෙංගු වැළඳුණු ළමා හා වැඩිහිටි රෝගීන් 160 දෙනෙකු රෝහල් වාට්‌ටුවල ප්‍රතිකාර ලබන බවද එක් ඇඳක රෝගීන් දෙදෙනා බැගින් රඳවා තිබෙන බවද අධ්‍යක්‍ෂවරයා පැවැසීය.
රෝහල් පරිශ්‍රය සතියකට වරක් පිරිසිදු කළද රෝහල වටා පදිංචිව සිටින නිවැසියන් ඔවුන්ගේ නිවෙස්‌ අවට ශුද්ධ පවිත්‍ර කිරීමක් කෙරෙහි යොමු නොවීමෙන් ඩෙංගු මදුරුවන් බහුලව බෝවී ඇතැයිද වාර්තාවේ.
Source:www.divaina.com
2013 වර්ෂයේ ගත වූ මාස 12 තුළදී, ඩෙංගු බවට සැක කෙරෙන රෝගීන් 31876 ක් දිවයින මුළුල්ලෙන්ම වසංගත රෝග විද්‍යා ඒකකයට වාර්තා වී ඇත.
ඩෙංගු රෝගීන්ගෙන් ආසන්න වශයෙන් 51.55% ක් පමණ වාර්තා වූයේ බස්නාහිර පළාතෙනි. වැඩිම ඩෙංගු රෝගීන් සංඛ්‍යාව වාර්තා වූයේ 3වන සතිය තුළදීය.
මදුරුවන් බෝවීමට ඉඩ ඇති ස්ථාන පරිසරයෙන් අඛණ්ඩව ඉවත් කිරීම් අවශ්‍යතාව මෙම තත්ත්වය මගින් පෙන්නුම් කෙරේ. එමෙන්ම උණ රෝගය වැළඳීමෙන් දින තුනක් ඉකුත් වූ පසුත් රෝගය පවතී නම් වෛද්‍ය ප්‍රතිකාර ලබා ගැනීම වැදගත් වේ.
Source:www.epid.gov.lk
මහරගම පොලිසිය “ඩෙංගු වලකමු“ තේමාව සිතුවමට නගයි.
Written by Super Userමහරගම පොලිසිය ප්‍රදේශයේ මහජනතාව දැනුවත් කිරීම සදහා පොලිස් ස්ථානයේ බිත්ති මත ඩෙංගු රෝගය හා එය ව්‍යාප්තිය වලක්වාගත යුතු ආකාරය සිතුවමට ලක් කර ඇති අයුරු කැමරා කාචයට හසුකරගන්නට හැකි විය.
ආයෙත් ඒ මරුවා සූදානම්
මේ වසර තුල ඩෙංගු රෝගීන් 2475ක් ද මරණ 11 ක් ද වාර්තා වී ඇතැයි කොළඹ මහ නගර සභාව සඳහන් කරයි.
ශ්‍රියානි විජේසිංහ / රන්මලී සෝමසිරි
Source:www.lakbima.lk
More...
ඩෙංගු දෙවැනි කාණ්ඩයේ වෛරසය ශ්‍රී ලංකාවටත් පැතිරීමේ අවදානමක්
Written by Super Userඉන්දියාව ඇතුළු බොහෝ රටවල මේ දිනවල ඩෙංගු දෙවැනි කාණ්ඩයේ වෛරස් තත්ත්වය වසංගත තත්ත්වයක් දක්වා වර්ධනය වී ඇති බැවින් එම වෛරසය ශ්‍රී ලංකාවේ හිස එසවීමේ අවදානමක් ඇති බවට වසංගත රෝග විද්‍යා අංශය සෞඛ්‍ය අමාත්‍යාංශයට අනතුරු අඟවා ඇති බව අමාත්‍යාංශයේ ජ්‍යෙෂ්ඨ නිලධාරියෙක් ‘රිවිර’ට පැවසීය.
පසුගිය වසරේ මැයි සහ ජුනි මස වන විට ශ්‍රී ලංකාවේ ඩෙංගු වසංගත තත්ත්වයක් පැවතියද මේ වසරේ එම තත්ත්වය උද්ගත නොවුණේ ඩෙංගු පළමු වෛරස් කාණ්ඩයට රෝගීන්ගේ ඔරොත්තු දීම හේතුවෙන් බව හෙතෙම පැවසීය.
එහෙත් ඉන්දියාව ඇතුළු බොහෝ රටවල මේ දිනවල පැතිර යන ඩෙංගු දෙවැනි කාණ්ඩයේ වෛරස් තත්ත්වය ශ්‍රී ලංකාවේ රෝගීන්ට ඇතිවුවහොත් ඔරොත්තු දීමේ හැකියාව නොමැති බැවින් එය වසංගත තත්ත්වයක් දක්වා පැතිර යා හැකි බවත් රෝගීන් වැඩි වීමේ අවදානම හා රෝගීන් මිය යාමේ අවදානම වැඩි විය හැකි බව එම නිලධාරියා අවධාරණය කළේය.
ඩෙංගු පළමු කාණ්ඩයේ වෛරස් තත්ත්වය වසංගතයක් දක්වා මෙම වසරේ ව්‍යාප්ත නොවුණේ ඩෙංගු මර්දන කටයුතු සාර්ථකව සිදු කළ නිසා බවත් දෙවැනි වෛරස් කාණ්ඩය මෙරටට ඇතුළු වුවහොත් එය මර්දනය කිරීමට පියවර ගත යුතු බවත් එසේ නොවුණොත් ඩෙංගු වෛරස් තත්ත්වය යළි ඉදිරි කාලයේදී හිස එසවිය හැකි බවත් වසංගත රෝග විද්‍යා අංශය අමාත්‍යාංශයට අවධාරණය කර තිබේ.
මෙම වෛරස් කාණ්ඩයේ රෝග ලක්ෂණද ඩෙංගු රෝගීන්ගේ රෝග ලක්ෂණ වේ.
එහෙත් දෙවැනි කාණ්ඩයේ වෛරස් තත්ත්වය රෝගියකුට ඇතුළු වුවහොත් ඔරොත්තු දීමේ නොහැකියාව හේතුවෙන් අසාධ්‍ය විය හැකි බව එම අංශය පෙන්වා දී තිබේ.
Source:www.rivira.lk/edition/article/
හර්ෂණී වීරරත්න
අගෝස්තු මාසයේ ඩෙංගු රෝගීන් ගණන 1500ක් ඉක්මවයි. මෙම වසරේ විසි දහසකට ඩෙංගු වැළඳී ඇත.
මේ මාසයේ ඩෙංගු රෝගීන් 1500 නගී සඳහා ලැබී ඇති ප‍්‍රතිචාර.
පිටබැද්දර ජයා 2013-09-01 07:59:52
කුමාර, ඒ වෛද්‍යතුමියගේ ලිපිනය දෙන්න බැරිද කරුණාකරලා? ඔයාටත් පින්සිද්ධ වෙනවා (නි)
කුමාර 2013-09-01 07:29:35
අම්බලන්ගොඩ ඉන්න දේශීය වෛද්‍යතුමියගෙන් බෙහෙත් ගන්න. ඉංග්‍රීසි බෙහෙත් වලට යන මිලියන ගණන් මුදල් ඉතිරි කරගන්න. (නි)
රෝයි 2013-08-31 17:53:57
මටත් මේ අවුරුද්ද පටන් ගනිද්දිම ඩෙංගු වැළඳුන නිසා එහි ඇති අමාරුව හොඳටම දන්නවා. අපේ නගර සභා ඒ තරම් හොඳයිනේ. ඒකයි මේ තරම් ඩෙංගු රෝගීන් වැඩිවෙන්නේ. හවස් වුන ගමන් මදුරු දැලක් අස්සට රිංගන්නයි අපිට දැන් වෙලා තියෙන්නේ. මට ඩෙංගු හැදුනේ ග්‍රෑන්ඩ්පාස් වල ඉඳලා. මගේ යාළුවෙකුටත් ඒ එක්කම හැදුනා. දැනටත් අපි ඉන්නේ බයේ. ඒ තරම් මදුරුවො ග්‍රෑන්ඩ්පාස් වල. (නි)
අමිල කටුනායක 2013-08-31 21:18:15
මම හැමදාම උදේ වැඩ පටන් ගන්නේ වත්ත සුද්ද කරලා පැය දෙකක් , කොච්චර කලත් මදුරුවෝ පිරිල
දර්ශන 2013-08-31 19:26:02
අපේ අය කිසි දිනෙක නිසි පාඩම් ඉගෙන නොගන්නා බැවි මෙඉන් පවසන්නේ , සමුහිකත්වයක් නොමැතිකම,කළමනා කාරිත්වයක් නොමැති කම මෙයට මුල,වසර 4කත පෙර මව මිය ගියේ ඩෙංගු නිසා එම දුක සැමදා මට දනීවි. (දී)
දුමින්ද 2013-09-01 05:49:22
සැම සතියකම වරක් වත් තමන්ගේ වටාපිටාව ගැන සැළකිලිමත් වන්න, සමහර අය සිතන්නේ කසල පවිත්‍ර කිරීම අපහාසාත්මක දෙයක් ලෙසයි. එම මානසිකත්වයෙන් මිදෙන්න.සමාජ වෙබ් අඩවිවලින් අනිත් අය දැනුවත් කරන්න අදම ක්‍රියාත්මක වන්න. (නි)
උපාලි 2013-09-01 06:13:22
කෝ කියුබානු බැක්ටීරියාව? කෝ අර දේශීයව හොයා ගත්තයි කියන බෙහෙත? කෝ අර වෛද්‍යාචාර්ය තුමියක් හොයා ගත්තු බෙහෙත? කෝ ඩෙංගු මර්දන සති, කඩා පැනීම්, නඩු පැවරීම් වල ප්‍රතිපල? ඒ ඔක්කොටම වඩා මදුරු කොයිල් කාරයෝ බලවත්ද? (නි)
පාලිත 2013-09-01 09:46:26
පාරක් ඇමති කෙනෙක් කියුවේ වැඩිය මැරිලා නැහැ තවම හතර දෙනෙක් විතරයි කියලා (දී)
අපොන්සු 2013-09-01 12:13:41
මේ ඩෙංගු වැළදුන 1500 ටම නඩු දාන්නයි තියෙන්නේ, ඒ ගමන්ම ඒක බෝ කරපු මදුරුවොත් අල්ලලා නඩු දැම්මා නම් හරි. (ස)
වික්‍රම 2013-09-01 14:17:18
ඔබේ දුව, පුතා, සහෝදර සහෝදරිය හෝ ඔබම හෝ ඩෙංගු රෝගයේ රෝග ලක්ෂණ පෙන්වමින් අමාරු වුණොත් රෝහලට ගෙන එන්න එපා.. නිවසේ සිට හෝ "එක බෙහෙතින් ඩෙංගු නිට්ටාවට සුව කරන්නන්ගේ" සුව කිරීමේ මධ්‍යස්ථාන වලට ගොස් බෙහෙත් ලබා දෙන්න.. (දී)
Source:www.lankadeepa.lk/index.php/articles/165402
ජනාධිපති කාර්ය සාධක බළකායේදී අද ප්‍රකාශ කෙරේ
සන්ධ්‍යා කරුණාරත්න
අද (18) පැවැත්වෙන ජනාධිපති ඩෙංගු කාර්ය සාධන බළකායේදී වහාම ක්‍රියාත්මක වන පරිදි ජාතික මදුරු මර්දන මාසයක් ප්‍රකාශයට පත් කිරීමට සෞඛ්‍ය අමාත්‍යාංශය තීරණය කර ඇත.මෙතෙක් ක්‍රියාත්මක කළ මදුරු මර්දන සති වෙනුවට ජාතික මදුරු මර්දන මාසයක් ප්‍රකාශයට පත් කිරීමට තීරණය කරන බව සෞඛ්‍ය ඇමැති මෛත්‍රීපාල සිරිසේන මහතා පවසයි.
සියලුම රාජ්‍ය ආයතන, සෞඛ්‍ය ආයතන, පෞද්ගලික ආයතන, රටේ ප්‍රජාව හා සියලු අංශ ඒකාබද්ධ කර ගනිමිත් මේ වැඩපි‍ළිවෙළ ක්‍රියාත්මක කරන බව ද ඇමැතිවරයා ප්‍රකාශ කරයි.
ජනාධිපති ඩෙංගු කාර්ය සාධන බළකාය නිකුත් කර තිබෙන චක්‍රලේඛයන්ට අනුව සියලු ආයතන ක්‍රියාත්මක වූවා නම් අද වන විට ඩෙංගු ව්‍යසනය මෙතරම් දුරට ව්‍යාප්ත නොවන්නේ යැයි ද ඒ මහතා කීය.
ජනාධිපති ඩෙංගු කාර්ය සාධන බළකායට අමාත්‍යාංශ දහයක නියෝජනය ලැබෙන බවත් වරින් වර පවතින වර්ෂාව දැනට ක්‍රියාත්මක කරන ඩෙංගු වැඩසටහන්වලට බාධාවක් වී ඇති බවත් ඇමැතිවරයා සඳහන් කරයි.
එක් එක් අංශවලට පැවරී ඇති වගකීම් පැහැර හැරීම නිසා ඩෙංගු අධි වසංගතයක් දක්වා වර්ධනය වී ඇති බවත් අද (18) පැවැත්වෙන ජනාධිපති ඩෙංගු කාර්ය සාධන බලකායේදී මේ පිළිබඳ ඒ ඒ අමාත්‍යාංශ බාර ඇමැතිවරුන්ට හා ලේකම්වරුන්ට පැහැදිලි කර දී තම තමන්ගේ ආයතනවල වගකීම නිවැරදි ලෙස ඉටු කරන ලෙසට ඉල්ලීමක් කරන බවත් ඇමැතිවරයා ප්‍රකාශ කළේය.
ගෝලීය උෂ්ණත්වය ඉහළ යාමේදී ඇති වන වෙනස්කම් ඩෙංගු මදුරු ව්‍යාප්තිය වැඩි වීමට හේතු වන්නේ යැයි ද මදුරු ව්‍යාප්තිය පාලනය කිරීමේදී ඒ නිසා ස්වාභාව ධර්මයා සමඟ සටන් කිරීමට සිදුව තිබෙන්නේ යැයි ද ඒ මහතා පැවැසුවේය.
ඩෙංගු වෛරසය ශරීරගත වීම නිසා රුධිර සංසරණ පද්ධතියට හා ප්‍රතිශක්තිකරණ පද්ධතියට ප්‍රධාන වශයෙන්ම බලපෑම් කරන බව ජාතික ඩෙංගු මර්දන වැඩසටහනේ අධ්යක්ෂ වෛද්‍ය රංජිත් බටුවන්තුඩාව මහතා පවසයි.
එම වෛරසය ශරීරගත වීම නිසා ස්වසන පද්ධතියට හානියක් සිදුනොවන්නේ යැයි ද ස්වසන පද්ධතිය ආශ්‍රිත රෝග වන නියුමෝනියාව, මොළේ උණ යනාදී රෝග වැළඳීමට ඩෙංගු වෛරසය බලපෑමක් සිදු නොකරන්නේ යැයි ද ඔහු පැවැසුවේය.
සාමාන්‍ය උණ හෝ තද උණ ඩෙංගු රෝගයේ ප්‍රධාන ලක්ෂණය වන බවත් හිසරදය, වමනය, මස් පිඬුවල වේදනාව සාමාන්‍ය රෝග ලක්ෂණ බවත් වෛද්‍ය බටුවන්තුඩාව මහතා පැවැසීය.
source:www.dinamina.lk/2012/06/18/_art.asp?fn=n1206184
බොරැල්ල වෛද්‍ය පර්යේෂණායතනයේ නව සොයාගැනීමක්
නව මදුරු විශේෂයක් වසර 124 කට පසුව මෙරටින් හඳුනාගත් බව බොරැල්ල වෛද්‍ය පර්යේෂණායතනය පවසයි.
ඩෙංගු මදුරුවාට බෙහෙවින් සමානකමක් දක්වන මේ මදුරුවාගේ විශේෂත්වය වන්නේ කීට අවස්ථාවේදී ඩෙංගු මදුරු කීටයන් ආහාරයට ගැනීම බව පර්යේෂණවලින් හෙළි වී තිබේ.
ටොපොමියා (Topomiya) වර්ගයට අයත් මේ මදුරු විශේෂය මෙරටින් වාර්තා වන 17 වැනි මදුරු කාණ්ඩය බවට වාර්තා වී ඇත.
ඩෙංගු මදුරුවාට බෙහෙවින් සමානකමක් මේ මදුරුවාගෙන් දක්නට ලැබුණත් මිනිස් රුධිරය උරාබොන බවට පර්යේෂණවලින් මෙතෙක් වාර්තා වී නොමැති බව වෛද්‍ය පර්යේෂණායතනයේ අධ්යක්ෂ වෛද්‍ය අනිල් සමරනායක මහතා පවසයි.
මේ මදුරු විශේෂය බෝ වීම එක්තරා විදියකට ඩෙංගු මදුරුවන් සොබා දහම ඉක්මවා යාම වැළැක්වීම සඳහා සොබා දහම විසින්ම ඔවුන්ගේ විනාශය ළඟා කරන මදුරු විශේෂයක් නිර්මාණය කිරීමක් දැයි කීට විද්‍යාඥයන් උපකල්පනය කරයි.
නව මදුරු විශේෂය වාර්තා වීමට පෙර මෙරට මදුරු විශේෂ 16 ක් සිටි අතර ඒ අතරට මදුරු කාණ්ඩ 140 ක් අයත් වෙති. ලෝකයේ වෙනත් රටවල මේ මදුරු විශේෂය දක්නට ලැබුණත් මෙරටින් මේ මදුරු විශේෂය සොයා ගැනීමට හැකි වී ඇත්තේ වසර 124 කට පසුව වීම විශේෂත්වයකි.
මේ මදුරු විශේෂය ඩෙංගු මදුරුවන් ආශ්‍රිතවම ජීවත් වන අතර සෙසු මදුරුවන්ට නොමැති ආකාරයේ මුඛ නාලිකා (ශුණ්ඩාව) දෙකක් පිහිටා තිබේ.
ඩබ්.ජී. ප්‍රේමරත්න, පී.රණසිංහ, වයි.ශ්‍රියාකාන්ති යන කීට විද්‍යාඥ සහකාරවරුන් විසින් මේ පර්යේෂණය සිදු කර ඇත. නව මදුරු විශේෂය සොයා ගැනීම සම්බන්ධ වාර්තාවක් සෞඛ්‍ය ඇමැතිවරයාටත්, සෞඛ්‍ය ලේකම්වරයාටත්, සෞඛ්‍ය සේවා අධ්යක්ෂ ජනරාල්වරයාටත් බාර දීමට නියමිත ය.